एनएसजेएफ स्पोर्टस अवार्ड : पारस खड्का उत्कृष्ट पुरुष खेलाडी
2018-05-17
नयाँ पार्टीमा न एमाले रहन्छ न माओवादी : प्रचण्ड
2018-05-17

अहिलेसम्मकै ठूलो पार्टी बन्यो नेकपा ‘अण्डरलाइन’

काठमाडौं, जेठ ३ – एमाले र माओवादी केन्द्रको एकतासँगै अहिले सम्मकै ठूलो पार्टीको स्थापना भएको छ । 

दुई पार्टीको एकीकरणसँगै नेपाली कम्युनिष्ट आन्दोलनको इतिहासमा सबैभन्दा ठूलो कम्युनिष्ट पार्टीको स्थापना भएको हो । २००६ सालमा पहिलो पटक कम्युनिष्ट पार्टी स्थापना भएको थियो । बेलाबेलामा फुट्दै र जुट्दै ६९ वर्ष गुजारेको कम्युनिष्ट पार्टी एमाले र माओवादी एकता भएसँगै नयाँ  ठूलो पार्टी बनेको हो । नेपाल कम्युनिष्ट पार्टी वामपन्थी शक्तिमध्ये मात्र होइन संघीय संसद, प्रदेशसभा र स्थानीय सरकारमा प्रतिनिधित्वका हिसाबले पनि नेपालको इतिहासकै सबैभन्दा शक्तिशाली पार्टी भएको छ ।

गएको असोजमा तेस्रो चरणको स्थानीय तहको चुनाव सम्पन्न भएपछि दुई पार्टीबीच एकीकरणको प्रक्रिया सुरु भएको थियो । २०७४ असोज १७ गते ६ बुँदे सहमति गरेर एमाले र माओवादी केन्द्रले चुनावी तालमेलको घोषणा गरेका हुन् । उनीहरुले फागुन ७ गते दुई दलले एकता गर्ने सहमति गरेका थिए । असोज १७ गते राष्ट्रिय सभागृहमा कार्यक्रम गरी पार्टी एकता तथा वाम चुनावी तालमेल गर्ने निर्णय गरेका दुवै दलले विधिबत् रुपमा आज एकता गरेका हुन् । नेताहरूले नसोचेको दिनमा पार्टी एकता हुने बताउँदै आएका थिए । नेताहरुले भनेजस्तै गरी पछिल्ला दुई दिनमा भएका घटनाक्रमसँगै एकता प्रक्रिया टुंगिएको छ ।

राष्ट्रिय सभागृहमै आज भएको पार्टी एकता घोषणा कार्यक्रममा नेकपाका नेता जनार्दन शर्माले असोज १७ गतेबाट सुरु भएको एकता प्रक्रिया जेठ ३ मा आएर पूरा भएको बताउनुभयो । उहाँले जनआकांक्षा अनुसार दुई पार्टीको एकता भएको बताउनुभयो । नेता शर्माले अध्यक्षद्वय केपी ओली र पुष्पकमल दाहाल प्रचण्डले भनेजस्तै सुशासन र भ्रष्टाचार नियन्त्रणमा सबै नेता कार्यकर्ता कटिबद्ध भएर लाग्नुपर्ने बेला भएको पनि बताउनुभयो ।

त्यस्तै नेता माधवकुमार नेपालले जनआकांक्षा अनुरुप नै विधिवत एकीकरण गरी पार्टी पुनर्गठन गरेको बताउनुभयो । नयाँ पार्टीमा ओली र दाहाल सहअध्यक्ष, पूर्वप्रधानमन्त्रीहरु माधवकुमार नेपाल र झलनाथ खनाल पार्टीका बरिष्ठ नेता हुनुहुनेछ । त्यस्तै एमालेका २६ र माओवादीका १९ जना गरी ४५ सदस्यीय स्थायी समिति बनेको छ । नयाँ पार्टीमा ४ सय ४१ जना केन्द्रीय सदस्य छन् । 

एमालेका तर्फबाट २ सय ४१ र माओवादी केन्द्रका २ सय जना मिलाएर नयाँ केन्द्रीय समिति बनेको हो । शीर्ष ९ नेता सम्मिलित सचिवालय बनाइएको छ । वरियताअनुसार प्रधानमन्त्री केपी शर्मा ओली शीर्ष स्थानमा हुनुहुन्छ । दोस्रोमा पुष्पकमल दाहाल प्रचण्ड रहनुभएको छ । त्यसैगरी तेस्रोमा माधवकुमार नेपाल, चौथोमा झलनाथ खनाल, पाँचौमा वामदेव गौतम, छैठौंमा नारायणकाजी श्रेष्ठ, सातौंमा ईश्वर पोखरेल, आठौंमा रामबहादुर थापा र नवौं स्थानमा बिष्णु पौडेल हुनुहुन्छ । 
विष्णु पौडेललाई पार्टीको महासचिव र नारायणकाजी श्रेष्ठलाई पार्टी प्रवक्ताको जिम्मेवारी दिने सहमति भएको छ । तीन महिनाभित्र जनवर्गीय संगठनको एकीकरण  पनि टुंगो लगाउने सहमति भएको छ । 

Source: Ujyalo Network ले छापेको छ ।

Leave a Reply

Your email address will not be published. Required fields are marked *