कर्णाली प्रिमियर लिगः सेमिफाइनलका दुई खेल हुँदै
2018-05-25
आईपीएलकाे फाइनल पुग्न कोलकाता र हैदराबाद खेल्दै
2018-05-25

​करोडौं लगानी भएको बाटो उस्तै, तीर्थयात्रीलाई सास्ती

केशबप्रसाद भट्टराई/उज्यालो ।

ताप्लेजुङ, जेठ १० – लाखौँ पर्यटक र भक्तजनको घुँइचो लाग्ने ताप्लेजुङको पाथीभरा देवीको मन्दिर पुग्ने सडक बिग्रिएपछि यात्रुलाइ सास्ती भएको छ । ठेकदाले काम नगरेपछि बाटो बिग्रिएको हो । सूर्य कन्ट्रक्सन फर्मले २ वर्ष अगाडि बाटो पिच तथा ग्राभेल गर्ने ठेक्का पाए पनि अहिलेसम्म काम नसक्दा बाटो जस्ताको त्यस्तै रहेको र यात्रामा सास्ती भएको यात्रीले बताएका छन् ।

वर्षौँदेखि लथालिङ्ग बनेको सडक अहिलेसम्म करोडौं रुपैंया खर्च भए पनि जस्ताको तस्तै रहेको यो बाटोमा गाडी चलाउनेहरुको अनुभव छ । पाथीभरा देवीको आस्था र विश्वास अनि यात्रुको सेवाका लागि जोखिम लिएर ट्याक्सी र जीप चलाएको मे १ ज १५२२ नम्बरका जीप चालक गोपाल भट्टराईले बताउनुभयो ।

मे १ ज १६४२ नम्बरका जीप चालक पेम्बा तामाङ सुकेटारदेखि जाँदा र काफ्लेपाटीबाट सदरमुकाम फुङ्लिङ फर्किँदा यात्रु आतिएर पटक–पटक जीप रोक्न लगाउने गरेको अनुभव सुनाउनुहुन्छ । सडकका खाल्डाखुल्डिले जीप यात्रा जोखिमपूर्ण बनाएको हो ।

नेपाल सरकारले २०५३ सालमा गठन गरेको पाथीभरा क्षेत्र विकास समितिको भूमिका प्रभावकारी नहुँदा पनि समस्या भएको स्थानीयवासी बताउँछन् । कोषले पाथीभराको भेटी संकलन आफूले गर्न पाउनुपर्ने भन्नेमा मात्र ध्यान दिएको  तर यात्रुका लागि कुनै काम नगरेको उनीहरुको आरोप छ । पाथीभरामा तीर्थयात्रीले चढाएको ३ करोड रुपैयाँ बैंकमा राखिएको छ ।

रकम खर्च गर्ने आधार र नीति नहुँदा रकम खर्च गर्न नसकिएको पाथीभरा संरक्षण तथा सम्बर्द्दन समितिले बताएको छ । समितिका उपाध्यक्ष रणबहादुर कार्कीले सडकको स्तरोन्नति गर्न क्षेत्रीय पर्यटक मार्ग घोषणा गरेर सरकारले काम गरिरहेकाले समितिले चासो नदेखाएको बताउनुभयो । पाथीभरामा वार्षिक ३ लाखदेखि ४ लाखसम्म तीर्थ यात्री पुग्ने गरेका छन् । 

सुकेटारबाट १० किलोमिटर काफ्लेपाटीसम्मको सडक निर्माणको ठेक्का ५ करोड रुपैयाँमा सूर्य कन्ट्रक्सनले लिएको भए पनि ५० प्रतिशत पनि काम नगरेपछि उत्तर दक्षिण (ओलाङचुङगोला) सडक कार्यालयले काबाहीका लागि माथिल्लो निकायमा सिफारिस गरेको कार्यालय प्रमुख कुबेर नेपालीले बताउनुभयो । उहाँले सूकेटारबाट २ किलोमिटर अर्थात् गुप्तेसम्म कालोपत्रे गर्ने ठेक्का पनि २ करोड ५० लाखमा लिएको यो कम्पनीलाई फर्मलाई कालो सूचीमा राख्न सिफारिस गरेको नेपालीले बताउनुभयो ।

उहाँले सडक डिभिजन कार्यालय इलामबाट कही वर्ष अगाडि ५५ लाख रुपैयाँ खर्च भएको र ०६९/०७० मा २५ लाख, ०७०/०७१ मा २५ लाख, ०७१/०७२ मा ६७ लाख, ०७२÷७३ अर्थात चालु आर्थिक वर्षमा १० लाख खर्च भई सकेको जानकारी पनि दिनुभयोे । यसरी करोडौ रुपैयाँ खर्च हुँदासमेत अहिलेसम्म सडकको अवस्था भने उस्तै छ ।

यस्तो बाटोमा गाडी चलाउनै नदिनुपर्ने आवाज पनि उठ्न थालेको छ । तर जोखिमपूर्ण सडकमा न त गाडी चल्न बन्द छ न त सडकको सुधार नै भएको छ । 

Source: Ujyalo Network ले छापेको छ ।

Leave a Reply

Your email address will not be published. Required fields are marked *